الواقفه، والقاعده المستريحه
والراكضه، والطايره في سماها
والماشيه إن صادفت هاب ريحه
والناويه لكن تطالع وراها
والعاجزه مثل الوعول الجريحه
تصعد وترجع ما توصّل مداها
حالات... والساحات جداً فسيحه
حسْب العزوم الباذله منتهاها
بس عندنا... تبدي الجهود الشحيحه
هذا وربي من الموارد عطاها
إذا نصحنا... تعتبرها فضيحه
وإذا سكتنا... اقهرتنا معاها
يا رب وجّهها الدروب الصحيحه
- أقلّها - «ترجع» إلى مستواها!!