درايش: يا مجلس الأمّة...

وضّاح

نشر في 02-11-2022

مجلس الأمة... عسى عمرك طويل
ويا عسى الإنجاز في عهدك يطول
لا تجامل في الدوا شخصٍ عليل
اوصف الترياق له حسْب الأصول
«إبرة التخدير» لآلامه تشيل
لكن التأثير في لحظه يزول
ندري إنّك في العطايا مو بخيل
ومنهو قال «المال» هو كل الحلول!
«بيع اجازات الموظف» مستحيل
تنتهي فينا على أعتاب الوصول
و«الصفوف» اللي تبي تقبض بديل
و«العمل» - أصلاً- ترى سهْمه بْنزول
«للعمل قيمه» بمعناه الجميل
ليش كل «قيمه» بْبلدنا في أفول؟!
لا تربّي اجيال من جيلٍ لجيل
من موظف شَرْه والثاني كسول
يا ممثّلنا ترى دورك أصيل
اصْدِق بنقل الرسايل يا رسول