لا يحترق قلبك ترى الموقف سخيف
مو كل أمُر لازم تعدِّل غلطته
منته أبو للناس، كل جهدك ضعيف
ومنته أبوالعالم تصلِّح فكرته
تتْعَب إذا كل شي تحتاجه نظيف
ما يكتمل أي شي إلا بكَسْرته
مثل الوعَل تضْرب على الصلْد الكثيف
ومثل الغريب اللي انتهى في غربته
ما دمْت ضيف ومن على هالأرض ضيف
اتْرك ولا تختار رسمة خطْوته
خلّك «فراشه والأثَر»* جداً خفيف
وجناحها يعطي نتيجه بخفقته
ما تلقى في الدنيا وحياتك أي شريف
إذا جذي تدقِّق وتحْسِب كلمته
ياما دخَلْت أشجار في الدنيا وريف
والليل في الغابه تترجِّم عتمته
وياما صحَبْت الناس في المعنى الكليف
والناس غصن أشجار هو وقدْرته
إذا قِدَرْت تضيف للأخيار... ضِيف
واتبع منو ما ينخفض في هِمتّه
بعض الشجر يعطيك بالظاهِر خريف
ومن الحيا يخْفي بجذْره خضرته
* نظرية أثَر الفراشة: هي نظرية فلسفية فيزيائية تعني بداية حركة أو حدث بسيط جداً لا يكاد يُرى بالعين، فيتطوّر في تراتبية خفيّة لينتهي بتأثيره إلى نتيجة كبيرة، مختلفة.