درايش: أشياء في الخاطر

أول الأشياء: هاللحظه الجميله

ياللي في الكون اجتمع فيك الجمال

ثاني الأشياء: ما باليد حيله

والوصل في البعْد يحلى بالخيال

ثالث الأشياء: أحْرَقْت الفتيله

يوم طوّلْت السهر والليل طال

قلب هذا الليل كالسجن ونزيله

ولا تارك للعفو أي احتمال

رابع الأشياء: يا الغيمه البخيله

الرذاذ أشبه بلحظات الوصال

امطري والسيل لا يوقف مسيله

حتى لو دربه عَسِر ماله مجال

خامس الأشياء: ما عندي وسيله

يوم نادتني خيالاتك «تعال»

نزِّلي حبال الذهب من هالجديله

وارفعيني فوق لسفوح الجبال

سادس الأشياء: من يقدر يشيله

الثمر لمّا استوى قلبه ومال؟!

سابع الأشياء: بدَّدت الحصيله

كيف لا جاني الفجر يمشي عدال؟!

ما ذخرْت إلا الوعود المستحيله

ووجهك اللي بخافقي في كل حال

ثامن الأشياء: لي سِدْره ظليله

والعمر مكتوب له نقْص الظلال

تاسع وعاشر... وقصّتنا طويله

والجواب انقال من قبل السؤال