درايش: قرّب لنا يا أمل... خلْنا نشوفك
نشر
في 17-01-2024
آخر
تحديث 16-01-2024 | 20:02
قرّب اشوي يا أمل خلنا نشوفك
ليش غايب عن عيون الدار مُدّه
كم قلنا الوقت إحذر لا يطوفك
طاف لكن بيننا عهد ومودّه
ما نلومك بيننا لا زاد خوفك
كل ما طلّيت من بابٍ... نسدّه!
ولو تعذّر عندنا نسمح ظروفك
راح فينا الوقت في ودّه وردّه!
كنت فينا واحدٍ نعْرِف وصوفك
وعدْت كالوجه الغريب الكلّ ضدّه
يا أمل... بالله خَل تصْدق طيوفك
ولا تبقى كالوَهَم فوق المخدّه!!
