درايش: الله يهدي معاليه...

«الله يهديه...

ضيّع دروب الهوى عنّا بلا معنى

وضاع خيط الأمل لي كان يجمعنا»*

وضاعت خطاويه...

راعيت عهد الوفا

ناوي بوِدّ وصفا

أكتب معانيه...

الله - عقب الزلل- يهدي معاليه!

***

الله يحْييه...

الناس تنطر تمر في الدار لو غيمه

وفصل الشتا راح لا قطره ولا ديمه

هالموسم إشفيه؟!

الغيم شَح وصعَد

يشبه أملنا... ابتعَد

لا وين نرجيه؟!...

الله - عقب الزعل- يهدي معاليه!

***

الله يجزيه...

الوقت يمشي وقلوب الناس مكلومه

وما ندري منهو نعاتب يوم ونلومه

كلٍّ ب واديه!

ضمِّد جروح البلد

ملّينا ننطر بعَد

والجرح نطويه...

الله - عقب الخلل- يهدي معاليه!

***

الله ينجّيه...

من أوّل الدرب والخطوات مكشوفه

والكل يعرف مكان الشمس ويشوفه

حتّى بلياليه...

يا ليته لو يلتزم

يملك قرار وحزم

ودستور يحميه...

الله - لطريج العمل- يهدي معاليه

—————-

• أغنية معروفة للفنان الراحل/ أبوبكر سالم