الضعف... حفّار المنازل من الساس
والضعف... يهدم منزلك من أساسه
والضعف... يكمن بالضماير وخنّاس
شيطان ينطر فرصته للخساسه
لولاه ما صارت نميمه وجلّاس
والحش والغيبات وأهل النحاسه
لن «الصراحه» لا امتلى طافح الكاس
ملزوم يكسر بالغضب يوم كاسه
لو كان ناسه صارحوا باقي الناس
ما شفت واحد يستحق الرئاسه
ولو كان واحد منتهض رافع الراس
ما من حرامي يوم مرفوع راسه
تلمع على ثيابه جواهر مع ألماس
والكل عارف وين صانع الباسه!
يمشي الحرامي ومشيته عود ميّاس
متْغطرس وحوله الدلع للحراسه
الضعف هو ساس البلا وضربة الفاس
يوم الرخوم استامنوا للوناسه
ياخذ صوَر: انه يجامل على ساس
ما يجرح المخطي أبد في شراسه
وياخذ صوَر: إنّه مهذّب وحسّاس
علّ الحرامي يوم يعلن افلاسه!
المرجله تغلي مع حر الانفاس
والمرحله مو وقت لعْب السياسه!