لا تفكِّر يوم يا الجَلْد الصبور
ويخْلفك داعيك في عَد القبور
حِط بين القلب والتفكير سُور
وانشغِل باللي يبيك ويحتريك
كل مسافاتك ترى حذفة حصاة
من بداياتك إلى حد الممات
شين وإلّا زين في حلو الصفات
ورْد ذابل بالرمل من يشتريك!
عن مُناة الروح في وصل وجفا
إن صفا هالوقت وإلّا ما صُفا
كم خطَر في البال خاطر واختفى
وكنت في همّك على الحِفّه دريك
لا توقّف يوم في دربٍ تبيه
عِيش هاللحظه إذا قلبك نبيه
الفرح ماهو بضاعه وتشتريه
طَيْف كأطياف القزَح سَيَّر عليك
والرفاقا جبال في وحشة طريج
مالك بكثْره بهم... يكفي رفيچ
ما انوَلدْ وإلّا رُبى بنفْس الفريچ
لكن اتْحسّه مع انفاسك شريك
تنخلق أنثاك في كل النسا
جرح في ضلعك ترمّد ونْنسى
التمر - وإن قِيل- في نخل الحسا
كل نخيل الكون تطرَح بين ايديك
فكرة «المجموع» «بالفَرْد» البسيط
وقطرةٍ من ماي هي نفْس المحيط
كل ذرة كون - إن عِدْت الشريط-
تلقى مثْل اظلالها مزروع فيك