درايش: كمنجات خالد هلال
نشر
في 14-10-2024
آخر
تحديث 13-10-2024 | 19:57
له بالصحافه والسياسه أساليب
من يوم «بالصفحه الأخيره» ابتدينا
يقرا عدل لو في العباره عوى الذيب
ويناقش المعنى ولو ما رضينا
ما بيننا همْس القوافي الأعاجيب
وما بيننا لون الحبر في ايدينا
ما فيه بالصحبه النظيفه عذاريب
نبدي الشَرَه وأيام يشره علينا
وذيچ المواقف نزَّهَتْنا عن العيب
مَرَّت علينا في الزمن ما درينا
هو يدري إني لو تَرَس راسي الشيب
واقف على معناي ملجا ومينا
وانا أدري إنّه - دون شكٍّ ولا ريب-
ما يرضى كلمة عيب تلمس جبينه
يعْزِف وَتَر ويفوح من كفّه الطيب
كل ما ذوى فينا الغصن وانثنينا
ونْرد نرسل بالقوافي مكاتيب
لو ما مشى الساعي على ما نوينا
بعض الزماله بالصحافه لواهيب
وبعض الزماله كالسحاب إن ظمينا
