درايش: بين «هلالين»
نشر
في 13-11-2024
آخر
تحديث 12-11-2024 | 20:10
حِطْني بقلبك بين شَخْطة «هلالين»
وانا أحطّك رَمْز ما بين (الأقواس)
تعطيني التمييز عن ناس غالين
وأعطيك شرْح المختلف غير هالناس
خلْني (عباره) غامضه بالمضامين
لا دارت الدنيا وطُفَح هَم بالكاس
تقرا حروفي - لا غشا الليل - بعدين
وتمسح عن عيونك خواطر وهوجاس
وإن طال وقتي عارفٍ منزلي وين
بين الضلوع وبين طيّات الإحساس
بأول هبوب البرد والناس غافين
لاشْتَدّت الغفوه على عيون حراس
أطلع كما حرفٍ نِبَت له جناحين
وأحوم وأنزل فوق حبّات الألماس
إما بحلم يطوف في محجر العين
وإلّا خيال يشاركك طيْب الأنفاس!
