شعبي وطن

بيت في روحي بنيته... بيت من وهمي بنيت

كل ما يقوى حنيني... أتعلا وارفعه

لين صار اسهيل جاره، والجدي في ثاني بيت

والقمر علّق انجومه في جهاته الأربعه

فيه وصّيت النسيم وقلت: إن مرّه نويت...

إتهب في ضلوعي... أمانه... لا تكدّر مسمعه

وشلت من وجهي شموسي وقلت: لو إنّي انعميت

أستدل بنور وجهه في ظلامي... واتبعه

والنهر... يمّه حرفته (من مصبّه ما استحيت)

ما عصاني -اللّه خير- وما بخل في منبعه

ويوم خانتني اعزومي في الدروب اللي مشيت

أبعد الخطوه علي وقال: حلمه ضيّعه!

آه يا بعد المسافه... كم تعنيت وعنيت

ما لقيت إلا المنايا والنوايا مشرعه

إن شربت دموع عيني... قال توّك ما ارتويت

وإن شكيت الجوع... يضحك: هاك همّك وازرعه

الخطا... إني بنيته فووووق... والحين ابتليت

ما قطعني هالطريق... وما لي قلبن يقطعه!