العشرة

لامن هانت العشرة وغدت كل الوجيه اجناب

ولامن ضاعت النخوه يغور الوقت وايامه

يموت الحي شوف العين وكل ينهشه في ناب

كن الطيب هالايام ضاعت بالردى احكامه

كلٍ عايش بحالة تقل ماله ربع واصحاب

يشيل الحقد في جوفه طواه الجهل بلثامه

ليه الصدق فينا مات ليه الطيب فينا خاب

ليه الناس تكره بعض وكلٍ يرفع الهامة

تفرقنا مشاكلنا غدينا للأسف احزاب

كلن يكره الثاني يدوس اخوه بأقدامه

ترى الله ما دعى الجفوة بين الاهل والاقراب

حسوا يا بشر بالله كلٍ يذكر اسلامه

والا يالله سامحنا خلقنا للذنوب اسباب

خطينا بحق واجبنا عمانا الوقت بأنعامه

سجدنا ولك نواظرنا تهل دموعها سكاب

الا يالله ترحمنا وتعين قلوب منظامه

تعالوا نطوي الماضي نلم الشمل يالاحباب

تعالوا في نهار العيد نلم الشمل وارحامه

وتعالى يا وجيه الخير نفتح للمحبة باب

ترى الاعمار وان طالت ابد ماهي بدوامة