آخر وطن: ما أتخيّلني بدونك!
نشر
في 02-05-2008
آخر
تحديث 02-05-2008 | 00:00
ما أتخيّلني بدونك!يعني بسّ... معاد تبيني؟! يعني عَزَّمت بتقفّل الصباح بوجه قلبي وتِظلم الدنيا في عيني؟! يعني بسّ... معَاد يهمّك شوق قلبي رفّة جفوني عليك لا تمنّيتك تجيني؟! لا ولا حتى مشاريه الظما... يا الغيم... فيني؟! يعني عزّمت بتروح؟! يعني أَنسى إنّك إنتْ كنت لي أَجمل حبيب تمتلي روحي معاه ويحتويني؟! يعني أنسى ضحكتك نعناع كلامك دافي أنفاسك في صدري رقّتك والتفاصيل اللي نمَت... بينك وبيني؟! يعني أنسى كل هذا وبسّ أصدّق إنك إنت... معاد تبيني؟! ولو فرضت إني رضيت... باللي تبيه قللي... وين بس أودّي لهفتي... وشوقي... وحنيني؟! من قبل لا تروح قللي وين أودّي... صوتك اللي من كثر مانا عشقته صار عندي أغلى من أغلى سنيني؟! وين أودي وجهك اللي لا تخيّلته أصير مرفا... تسكنّي النوارس ويمْتلي بالعشب... طيني؟! وين أَودّي كل فرحه كانت بحبك معاك طرَّزْتني بالنجوم من بقايا خطوتي... لآخر هلال بجبيني؟! قلّلي يا جنّة عيوني وين اودّي... كل هداياك الثمينه واللي غَرّقْت بشذاها ياسميني؟! الرسايل والعطور ولّا حتى ساعتك واللي صارت كنّها... من بعض ايديني؟! وين أودّي كل هذا لو مشيت وقلتلي... إنك خلاص... معاد تبيني؟!! ما أتخيل... قلبي من غيرك... ولا... أقدر أحس... طعم الاغاني ولا في توت الاماني... ولا حتى بفرحتي لا... ولا بقاسي أنيني! يا حبيبي... ما اتخيّلني بدونك وما اتخيّل... شي فالدنيا... يبيني!
