شعبي إرحم صهيل الخيل...
نشر
في 09-03-2008
آخر
تحديث 09-03-2008 | 00:00
(1)يا توت قلبك ذبَل... شمْصبّرك يا توت؟! دخِّلنا في جنتك قبل الربيع يفوت مِتْلحّف ابْشَهوتك كالراهبه في دير في كل نسمه تهب... ألفين مرّه تموت! ما شِفتْ غيم السما الحابس دموع ووعَد؟! لا راضي ينزل تحت لا راضي يصعد بعَد ننطر- وضاع العمر- يجدَح شرار ورعد لكن يمر غيمنا... شهقه بوسط تابوت! كلماتنا بالعتب بوسات فوق الخد ما تروي هالمبتلي وما تجرحك يا ورد بالله لا تعتذر... من قال أبيك ترد؟! أبيك مثل الصدى... يكبر بدون الصوت (2) يـ وْليد بسّك حذَر خلنا نشق الليل بخيول هدها التعب مشتاقه حضن سهيل إقطع حبال الرسن، إرحم صهيل الخيل إكسر ضلوع الصدر تلقى الفرح مكبوت چذّاب راعي المثَل قال انحنوا للريح... وإلا ترى ينكسر غصن الشجر ويطيح ويصيح فيني: انتبه!! واقول: ليش تصيح؟! إمّا نصد الهوا... وإلا بعز نموت الخوف حوت انزرع بعيون بحّاره يقطع وراهم- وهَم- غبّات غدّاره لو واجهوا خوفهم لو حلّوا اسراره چان أصبحوا كالنبي اللي نجا من الحوت (3) يا طير من علّمك؟! من فهّمك يا طير؟!! لحنك بقربي عزا... وفوق الدرايش غير؟! ما كنت أظنّك عذب... في هالجمال تصير ياللي تغنّي طَرَبْ... قلبي حجر منحوت كنت أوفي لمحبِّتك وانقّي حبّاتك واسقيك قطر الندى واحتار لسكاتك واشوفك بغرفتي تناجي سماواتك إشلون ما شفت أنا جناح الهوى مليوت!! (4) العاشقه وتُوتَها وذاك الهوى المكبوت والطير هاللي صُمَتْ... أو غيمنا/ التابوت والغصن ذاك الذي...، وبحّارنا والحوت... أحلامهم عاليه... طارت لسابع سما إن صعّدوها.......... كبَرَتْ وإن نَزّلوها.......... تموت!! وضّاح [email protected]
