آخر وطن: حَبِل!
نشر
في 18-04-2008
آخر
تحديث 18-04-2008 | 00:00
أنثى: (حَبِل!)رَجُل: (حَبِل؟!) من يوم ما طَاحَوا سوى فـ البيْر هذا هالقديم كل ما مسَكْ بيْده حَبِل يطْلَع قصير أو مِهْتِري! وفـ الحالتيْن ما يوَصِّله للي يَبي! أنثى: (نَبي)! رَجُل: لو كان هذا الْبِيْر حُوْت أظن إن احْسَاسنا إنّا في ماي يكفي عشان نحِسْ: عَطَش ماراح نموت)! الْبيْر يَخْنِقْ النِّفَسْ ضَيّْق عَميق كل السواد فيه احْتبَس، وكل ما لمَسْ حَجْم البياض في صُوتها الفَارع هَمَس: رَجُل: (حَبِلْ!! يشْبِه كثير اللّي نَبيْه وندَوّره) إحساسه إنه راح يموت يسْتَنْفِره! هذا السُّكون يحَمّسِه إنه يكون! البَرْد فيه •يجَمّرِه! أنثى: (حَبِل!) رَجُل: ( مِثْل اللي قَبْله مِهْتِري) وينْطفي كل اللي من لحْظَه اشْتَعَلْ بعْيُوْنَها• هُوّ انْفَعَل.. زَعَلْ.. سَأَلْ: رَجُل: (أَخُوْنَها؟!) هو يدْري إنّه مسْتَحيل، ما يقْدَرْ يسَنْبِل عُمُر.. مِن دوْنَها. اللحظه اللي كلّهُم.. يبونها.. أكيد تجي. أنثى: (حَبِلْ!) تفْرَح كثير، وتِكْتِشِف.. أنثى: (مِثْل اللي كان بَعْده.. قصير)!! ترْجَع تصير.. شَبَحْ رماد.. في قاع بيْر. رَجُل: (صدّْقيني راح نلقى حبل)! كل ما يشتتها الضجيج.. يلمّها. كل ماتهيْج.. ريْح بْسوَاد عْيونَها.. يغني لها. كانت مواويله خَليْج وبَحّته.. أصفى مرَازيم الأَلَم.. كان العَدَم.. هوّ اللي دوم يعَلّمه.. يفَلسِف خْيوط النسيْج!! رَجُل: (اسْم الدّموع: أَسْرارك اللي باحتِك الخوف هُوْ: تفاحتِك. والوَحْشَه دايم سِرّها: إذا توحَّدْتي في ظل.. إجتاحتِك. وسِرّْ هالظَلمَه بسيط: لو إنتي وَطَّنْتي النهار.. بكت عليك.. وصاحتِك)!! كان صُوته عَذْب ومِمْتلي.. دفا وشمُوع هيْ.. حَسّتِه أنثى: (إيْه.. والحَبِلْ) رَجُل: (مِن داخِلِك)! (مَحَّدْ يَعَرْف كثْرك أَبَدْ.. مَدَاخِلِك)! أنثى: (يا الرغبَه فينا شَجّري) رَجُل: (أو .. نَوّري.. أو كَسّري.. هذا الجدار أو دَوّري لنا حَبِل ما يكون قصير أو مِهْتري) أنثى: (يا الرّغْبَه فينا خَضّري الوَقت.. ونَفْسِك.. والــ... إنثى رَجُل: .........حَبِل)!!
