بلادنا يا بوك مدري شبلاها

يا عمر هالدنيا كثير غثاها

اذا اضحكت لك يوم بكتك ايام

بالك تصدق ضحكها مع زهاها

ترى الوعد ويا الغرابيل جدام

وارجو لك الثنتين خفف اخطاها

تراك تمشي فوق ارواح واجسام

من مات قبلك اندفن في ثراها

باترابها ضمت نبيين واعلام

وين الملوك اللي سعوا في بناها

اللي بنوا امجاد بابل والاهرام

وكسرى مليك الفرس واللي وراها

وينه ووين الروم غزاية الشام

اوين التتار اللي جيوشه تباها

في حربها ضد العروبة والاسلام

وهتلر وجند الرايخ اللي غذاها

بالشيفونية والتطرف والاجرام

وينه اوين اللي بلدنا... غزاها

بالليل واحنا ممنينن ونيام

مات او لقى وفقه وربك حماها

غصبٍ على اللي ايدوا غزو صدام

اللي نسوا فضل الكويت وعطاها

كلما شكوا ظيم الليالي والايام

يوم انهزم صدام والشيخ جاها

والشعب من حوله يشيلون الاعلام

وتنظفت من كل شر ٍدهاها

جانا علي طالح وابو لهب في عام

وابو براطم جى وحب الجباها

وخشوم نصف اشيوخنا وباس الاقدام

كل يبي نعطيه مما حباها

ربي ولو كان النذل ضدنا العام

ابلادنا يا بوك مدري شبلاها

فيها النذل مبسوط والحر منظام

اللي يبين للحكومة خطاها

من غيرته يحسب معادي وهدام

واللي على الحبلين يلعب معاها

ويسرق ويكذب مركزه دوم جدام

الله يعدلها ويحمي ثراها

ويهلك معاديها على مر الاعوام

هذي بلدنا ما نوالي سواها

بعد الولي لو نشرب المر اكوام

بالروح نفديها ونحمي حماها

ونسعى لصالحها رعايا وحكام

حتى يرفرف بالعدالة لواها

في ظل ابو ناصر ذرى كل منظام

شيخ الشيوخ اللي سعى في علاها

من صغر سنه يدفع الركب جدام

اللي بسموه كلبونا انتباها

واب اسرته نفخر على مر الايام