الرطوبة كسفتنا

في ضميرك يا وزير الكهربه

المحول عندنا من خربه

خان فينا الظهر وحنا نايمين

سامح الرحمن منهو ركبه

الرطوبة كسفتنا والحرار

شب فينا مالنا منه فرار

عندنا شياب واطفال صغار

واحد انشيله او واحد نسحبه

لو نظرت اشكالنا ترثي لنا

يا وزير الله يكون ابعوننا

ها الوزارة حيرت افكارنا

وهددتنا بانقطاع الكهربه

كل يوم تطلب لها زود اعتماد

للمكاين للمضخات الجداد

ليتنا من ها المبالغ نستفاد

عدل الحالة ترها خاربه

ليمتى من مالنا ما نستفيد

واحنا دوله عندها اكبر رصيد

صرنا ضحكه للقريب وللبعيد

والسبب كثر انقطاع الكهربه

انا شاعر عادتي دايم صريح

من وزارتكم ترى العالم تصيح

جان ما تقدر اتصلح استريح

ولا هذا النقد دايم بكتبه