ولهتي لوْ شويّ علي؟! اشتقتي لي؟! قوليلي: وشلون المسا... من غيري وشلون الصباح وشلون يمرّ... يومك عليك باهت، وبردان، وحزين؟! ولّا يمرّ من بعدي روعه وممتلي؟! حسبتي إن الفرقا ما بيني وبينك... للأبد ولا ابتسمتي في سرك وقلتي هالزعل مهما يطول سحابة صيف أكيد... أكيد بتنجلي؟! ولو تسمعين أغاني حِنّا نحبها ما يشاغبك قلبك يقول: عشاني اتصلي عليه وحشني صوته ضحكته... حتى جمر كلامه واحشني... وأبيه عشاني اتصلي عليه عشاني أرجوك اسألي حبيبتي... ما شاغبك قلبك علي؟! بالله قوليلي الصحيح: اشتقتي لي؟! أمانه ودّي أسألك طول الفراق... فكّرتي فيّ؟! قعدتي مرّه بغرفتك... تتمنظرين... وكنتي بكامل زينتك وقلتي لغنج أنوثتك: ودي يشوف تسريحتي نفسي يشم هذا العطر ويقوللي رايه فـ«الروج» الجديد وأيّ اللي أحلى... هذا... ولّا «روجي» الأوّلي؟! ودي يشاركني دلال أنوثتي ويضمّني ويمسح على راسي بحنان هو يدري إن لمسة إيديه... فيها حياتي ومقتلي!! حبيبتي فكّرتي فيّ... وإنتي على تسريحتك اشتقتي لي؟! ما اكذب عليك أنا كثير اشتقتلك عمري أحسه من غيرك خَلي لا أرضي أرض ولا نجوم... تزيّن الليل بسماي وتعتلي ضايع وينقصني انتماء لاني لأحد... ولاني لي! أنا كثير اشتقتلك حبيبتي... ما اشتقتي لي؟!
توابل - ثقافات
آخر وطن: اشتقتي لي!
13-03-2009