طاري الوسمي

خوي السفر والليل والصمت والساري

تغيّب... ولك في كل ما يشبهك جيره

على طاري الوسمي... ودرب التعب طاري

ترى البارحه طيف المطر مثري الديره

عبر بالدروب الخافية... وأنبت أسراري

وسريت وفؤادي ضايقِ من محاذيره

صحاري ظما ما ترتوي... وانت... وأنهاري

عيون مثل حلمي بها... عذبة السيره

سريت ولقيتك فجر همي ومشواري

وأنا اللي سري يبي العزا من مشاويره

مادامك تجي وأبعد مواصيلك أفكاري

تعذَّرك قلبٍ يعرفك من تباشيره

ودرب يجيبك وانت ما كنت به داري

مداه السكون اللي سبق عاصف الحيرة

عن اللي بقى عن نبتة الظل بأشعاري

أبيك أنت هتَّان المواعيد والغيره

أبيك السهر عن غفوة الطيف والطاري

لعهدك... لوجهِ في عيوني أساطيره