سلالة الخطيب والقطامي والمنيس وأحمد يوسف النفيسي والنيباري والسعدون وخليفة الوقيان وعبداللطيف الدعيج والبغدادي... وغيرهم من الرائعين لو تنتشر هذي السلاله الطيبه جان البلد في ألف خيرْ هذي السلاله عارفه الـ «اللا» معناها كبير «اللا»... مو بمعنى نعَم... ومْساومه «اللا»... مو يعني غرورْ... مْكابره و«اللا»... مو يعني تهز الراس وتْتّمتم خجلْ «ايصير خير»! «اللا» معناها شرفْ «اللا»... رفض لأي غلَطْ «اللا»... معناها فقط: انحِب هذي الغاليه... لكنّه حبْنا مختلف مرسوم غيرْ عشّاق (مو بس اللي انكتب اسمه على أعلاه) تحْت وتحَتْ فيه ناس تعشق هـ الوطن مسكين... محروم... وفقيرْ ! وأحلى العشق... أصله الفقر وأجمل وأحلى من عَشَق... هذا الفقيرْ لا شيخ يسكن كلمته ولا تأثّر في وزيرْ هو الوزير الممتلك وتْرقّى في حبّچ ملِك ومنهو ملَك حبّچ سوى هذي السلاله الطيبه وهذا الذي حافظ هواچ وعاشقچ ومن دون حُبّچ يرتبك أو يكتبچ: نقطه على السطر الأخير.
أخر كلام
شعبي السلالة الطيبة
13-02-2009