شعبي لا تكذب على نفسك !

إتقول إن البلد مختلْ ميزانه

وتقول إن الفساد يهز أركانه

وتقول إن العواصف مو رملْ أصفرْ

لكنّه ياسْ انحفر في الروح .. واعمانا

وتقول إن القبيله بالعه الدوله

والدوله من ضعفها .. يا صاح تعبانه

وتقول إن الطوايف لاعبه فينا

والطائفيه اشْعلت في القلب نيرانه

وتقول إن الشعَب .. دورين في مبنى

هذا في « حُمّى « وهذا بصيف « حمّانا «

وتقول كلّن سكتْ .. والنازلات اكْثرت

والناقلات اغرفت .. نفطه ومرجانه

وتقول وين العدل .. ما دام « مجلسنا «

نوّابه منّه اطْلعوا بجيوب مليانه

وتقول ما همّني إلا كويت الأمل

هذي اللي سمّيتها وقت الرضا .. « دانه «

إن كنت عند كلمتك ... باجر تصوّت لها

وإن كنت عند مبدأك .. صوّت على شانه