آخر وطن: شاعر... الليلة بس...!
نشر
في 26-12-2008
آخر
تحديث 26-12-2008 | 00:00
الليله بس... لاتزعلين!لو مهما حاول الزعل يغريك فيه لا تزعلين! أو بالغلط... صوتي وصل لك ممتلي بعضه... رماد لاتسمعين! الليلة بس أحلّفك... لا تزعلين! الليلة ولّعت الشموع، وزهّبت لك... بياض شعور... بيردّ لك من ياسمينك... ياسمين. الليلة عطّرت الطريق... اللي بيجيبك من ربيع لحظة فرح شابت مشاوير... وحنين! الليلة ياشمسي... أنا... جنّحت لك... قلب الظلام، قبل تجين! وكبّرت لك... حجم السما قبل لا إنتي... تشرقين! وبشّرت بك... نوارسي... وحزن مواني بارده ماتت صبر وهي... تنتظر ريحة حبايب من قبل لا يسافرون... مسافرين! قلت للأماني اليابسة... في سِدْرَة أيامي... تعيش. قبل لا إنتي تمطرين وزينتها من حلوى عيد الذكريات ولبّستها ثوب من شذى... كل الزهور... اللي بقَت... رغم السنين! تصدقين؟! قبل تجين... أنا انصدمت! حسيت ما عندي... ... ثياب!! ولا عطور! والليلة ماعندي... حِبِرْ! ولا بحر! ولا سما... ولا مسا! ولا مكان... يليق بك، ولا... أُكسجين! الليلة خليت الشبابيك العتيقة... موحيه، لا هي اللي مفتوحة: ندا! ولا هي مردودة: سكوت! وكل ما تَلَتْ عينك على قلبي سُوَر سبَّحْتْ... وقال كلي: آمين! الليلة قلت... لرموشي... وعيوني رجا: تكفين لا... لا ترمشين! جمعت أصابع كفي لك لوّنتها وسمّيتها...! هذا... جمر هذا... شتا هذا... صحو هذا... مزون والخنصر هذا... سميته: مناديل الرضى كل ما نويتي... تدمعين! الليلة بس... الليلة بس إرضي علي خلّي الزمان... اللي لقى صبح القصايد يكتبك جنون مصابيح وصوَر...! يملى المخابي بالفَرَج و... سنا أغاني... غنّّتها ليال الصابرين! أحلّفك باللي ملاني فيك... حب وجمّلك قسوه... ولين لا تزعلين الليلة بس... لا تزعلين. بتزعلين؟؟؟!!!
