شعبي إشحلاتچ في رمضان

العيون اللي تكحّل بالحوَر من دون كحله

تعزف بقلبي الكمان ..

والخدود اللي بصُفار الشمس لا مرّت حزينه ،

ذابله من الشوق چنْها ..

جدّدت فيني الزمان ،

الأربعين .. أوراق صفرا

في إدينچ لملميها

واهمسي بقلب الغصون الذابله .. (شيصير فيها ؟!)

بين غيمه وبين ليله:

تنقلب جنّه وربيعْ

وينقلب هالكون أخضر

حتى ذاك الخوف .. يتحوّل أمان

* * *

لا كحل أسود ولا أحمر شفايف

بس جمالچ كالنهر عاري

يفيض ألوان من روحه ومن نبع الحنان

ورنّة الضحكه مثل صوت المضاعد في يمينچ

لا رفعتيها .. يوقّف :

نبض هذا الليل ، والموّال ، والعاشق وقلبه ،

وينطرِب فيچ المكان

 

صدّقيني .. كل نهارات رمضان تمر عادي وينطفي

ضوها وحلاها

إلاّ إنتي

وحدچ إنتي ... إشحلاتچ في رمضان .