القصايد مهي ما!! ما تطفّي النار.. أو تروي ظما! القصايد مهي صبح يرْضِع الشّباك نور أو فضا عصفور أو يلمّ الظلما عن عري السما! القصايد مهي شمس.. وما تغيب.. كنّها وجه الحبيب! أو تدفّي فالشتا.. قلب الغريب أو تضوّي الدرب في قلب العمى! القصايد.. ما تسوّي أي شي ولا تسوى أي شي ما لها رمش وتمدّه في هجير الوقت فيّ وما ترد الجرح لو رامي رمى..! القصايد مهي ما. القصايد باختصار.. مهي إنتي ولا تشبه يوم كنتي بين ايديني وكنتي أقرب.. من حنيني الحين حتى.. ملح عيني! شوفي إنتي اليوم.. وينك؟! وانا.. ويني؟! بيننا أطول مسافه للزعل! بيننا هذا السحاب اللي ذبح.. وردة حنيني.. لا همى! والقصايد مهي ما.. القصايد ما تقولك لا.. ولا تقْدر.. تطولك! أو تميّز عطرك اللي.. يسبقك.. نورين من لحظة وصولك.. القصايد ما تشوف.. وشتسوي بي.. فصولك! وكيف تجفّف ورد شوقي.. لا نمى! والقصايد مهي ما..! لا تعنّين الكلام في مشاوير القصيد والخطاوي ليل والمسرى بعيد بتعطش حبال الوريد ويجفّ اللما والقصايد مهي ما.. ماتطفّي نار غيابك. ما تخلّي قلب عاشق يرتوي حدّ.. الظما
توابل
آخر وطن: القصايد مهي... ما!
11-12-2009