آخر وطن عاجز
نشر
في 25-12-2009
آخر
تحديث 25-12-2009 | 00:00
من كثر ماأحبك أنا... أقسى عليك أقسى عليك...أسرّب نجومك... من أبراج السما... للشيح! وأهرّب يدينك... من قلوب الحمام... للمنطفي... من شعر ومصابيح أكسر مزهريتك وأنثر عطر ورودها للريح! ليه أنا... أقسى عليك...؟! أوادعك وقت اللقا ووقت الوداع أشرّع أبواب المدى... لدروب عيّت تستريح... ليه بس أقسى عليك... وأسكن عيونك... دمعتين وشمعتك... ليل وضحكتك... تجريح؟!! من كثر ماأحبك؟!! عذرٍ تراوغه المزون برق تراوغه العيون أذكر إني قلت لك: من كثر ماأشتاقك أنا... أنسى أجيك! ويومها....... تركت بيدينك بقايا كحلك السايل وعذرٍ يشبه عيوني... ضريح! أنا ليه بس أقسى عليك؟! أدري إني حيل أحبك وأدري إني بأنكسر لو رحت وأذبل مثل أغاني ماتخضّر مثل دهشه ماتشجّر مثل جمره... ترتجي في شتاها المر نار! مثل عصفور يدوّر له فضا ويشوف كل الكون بجناحينه سوار وأدري إنك لو تصك الباب... بأقعد وحدي هناك... أعدّ حبات الرمل وبيجفّ في صبحي النهار وبتصير أحلامي قصار! كل هذا فيه أدري بس مدري... أنا ليه أقسى عليك؟! ليه أكذب بعذري وأقول... من كثر ماأشتاقك أنسى... أنسى لحظتها أجيك ومن كثر ماأحتاجك أعجز... أعترف إني...... أبيك
