شعبي أحلاه الجنون

الهوى أشكال...وأحلاه الجنون

والهنا في ناره مو في جنّته

وأعذبه كالريح ما يرضى السكون

الحرايق تلتهب في خطوته

إن تَرَس قلبك يبيِّن في العيون

وين عاشق مـ انْفضح من نظرته؟!

وأعذب الخلان...مو ذاك الهتون

لكن اللي إنت تصعد غيمته

وأصدق العشّاق من ينوي يخون

ويْتَراجع عن خياله ونيّته!

سهّرك:ليل وتعَب...خوف وشجون

لا فجر لا نور...إلا طلّته

الهوى كالشوك في خضر الغصون

وانت تدري...بس تَعَمّد لمسته!

وإن سَلَم عاشقْ من جروح وطعون

هذا تافه...لا تصدّق قصّته!