طلال بجـاد

ياخويّ الجنون اللي جنونـه: فنـون

والله انك تلبـّـست الجروح اجـودي!

تختلف... تشبه الحزن افـ جميع العيون

تنسكب: غيم... وانتـه بالجفاف اتعدي

علـّم الناس، كيف الناس لو يشعرون

تصبح الارض: جنـه في فرح سرمدي

ياطويل الشعر والحزن (أكتب/ تـكون)

من وراك يترنــم... كل جرح ٍ نـدي

اعرفك ياصديقي... آآآآآه لو يعرفون

كان ماجيت افسـّـر بالشعر مقصدي

قل: سُميّـه... وعلـّمني جمـال الطعون

قل: سُميّـه... وحسسني بـ قيمة (يدي)

قل: سُميّـه... وعلـّم هالمســـا من يكون؟!

يوم حنـّـا بـ ضَـلاَل البارحـه: نهتدي

قل: سُميّـه... وغسّـلني بـ قلبٍ حنون

من دموعـه تورّق كل حظٍ ردي

قل: سُميّـه... وسافر بي لـ ذاك الجنون...

(حارةٍ يحتضر في صدرها مولدي...

... ضحكة أشجـار واطفال ـ وصخب ـ يلعبون

وقصةٍ من نهايات الغلا... تبتدي)

قولها... واشعل الحيره: بـ قتل الظنون

حرر الصمت من سجن وقيود اجسدي

سيـّـل اللي بصدرك... واترك الما يخون

بكتبـك حلم واتهجـاك في مرقـدي

والله اني اعرفك ب س... لو يعرفون

كيف تركض وتركض في عروق اجسدي

يا طويل الشعر والحزن (أكتب/ تـكون)

يا طويل الشعر والحزن (أكتب/ نـكون)

وكلنـا من وراك... ندلنا... ونغـدي!