درايش:الكرسي

الكرسي... أحياناً خشب.

وإلاّ معدن

 وإلاّ أحيانا ذهب.

كرسي أسود، كرسي أخضر،

كرسي جلد، وكرسي ناعم من حرير ومخملي.

الكرسي... في أصل المعاني

يعني راحه من التعب.

الكرسي... معناه انتظارك في عياده، في وزاره، وإلاّ في بنكك

وناطر ياتي دورك

وفي الممرّات الطويله ياخذونك ل «العنايه»

والثواني من لهَب.

الكرسي... قهوه أو مزاج ونفَس شيشه

الكرسي... معناه المراره لمّا تقعد في عزا غالي فقدته

الكرسي... معناه التهاني وصالة أفراح الحبايب

ولا يدري –الكرسي غافل-

عن معانيه الكثيره... لأن قلبه من خشب.

كرسي مزروع بحديقه... في مسا

راحوا كل أهل الحديقه... بعد ما حلّ المسا

واهوه قاعد في مكانه

والشجر حوله... وصابر

ما درى انّه كان أوّل

شايل عثوق العنب!

وكان حضن وكان أم وكان غابه

يبّسوا قلبه وصدَّق

ماله بالخضره نسَب!

الكرسي نعمه

الكرسي نقمه

ما يهمّه شنهو أصله وشنهو فصله

ولا يسأل عن نوايا «القاعدين» الناطرين

وما سأل شنهو السبب!

وأخطر أنواع الكراسي

كرسي حاكم

ما درى وزنه ثجيل

وكاتم أنفاس الأوادم

واللي تحته... مو بلاط ومو حديد

ما درى الأرض اللي تحته

أرض خضرا...

إسمها الصجّي... الشعَب.