درايش بلد صامت!
نشر
في 09-03-2011
آخر
تحديث 09-03-2011 | 00:00
تحچّى يا بلد مجروح لا تكتم مراراتك تحچّى بالعذاب وبُوح ما نرضى انكساراتك سحابه في سماك تلوح... ما تنشف ولا تنزل ويعطيها الأمل منزل... قراها اللي يعرفونك تداريها بعد لا وين؟! خلْها تغسل اشجونك تحچّى يا بلد صامت... ذِبَحْت اللي يحبّونك! *** تحچّى وقول... في بعض الحچي راحه ترى اللي يحبس اهمومه بظلام الليل أبد ما تنشف اجراحه. *** تحچّى وقول... ترى ما لك عذر مقبول إذا هذا الزمن فاتك عسى الكلمات لا طارت حمايمها تخف احمول آهاتك. *** على هذا الثرى أحباب مشتاقه لعاداتك نبي تنفض جناح الخوف... نبي تكسر جناح الصمت... نبي طلّة جبينك فوق... تماري في ضياها الشمس نبي نفارق ليالي «الأمس» نبي الـ «الباچر» بخطواته يجي مغرور لا عصر انولد مثله ولا هـ «اليوم» وأنفاسه يشابه طيب نسماتك. تحچّى قُول... خلنا نشوف آياتك.
