آخر وطن: ظرف موضوعي

ظرف موضوعي

ليش

كل مابغيت أوطّن إيديني بيديك

عن كفي... في كفك تغيب...

و..ت..ن..ط..ف..ي؟!

ليش

كل مارسمت ملامحك...

حتى أعرفك... بالتراب...

تصير غبار...

وتختفي...؟!

ليش السراج سميتك إنت

وترتعش برد وتعرّى

برّى أغنيتي...

وتفك أزرة معطفي..؟!

ليش أنطرك من كم عمر؟!

من كم صبر؟؟

ومن كم جديله حزنها مر

وطويل؟!

ومن كم قيض؟!

ومن كم غيض...

ألحّفه صدري ولا هو يكتفي؟!

وأنت اللي ينقال لك وفي

أغمّض عيوني عليك

وماتفتح عيونك عليّ؟!

ليش يالوفي؟!

ليش أهمس لمحبوبتي البيضا

وأقول:

بنجيب لنا مليون ولد

الليله...

ونسنبل بلد!

تشدّها من شعرها

وتقول لها: «تلحّفي»!

ليش يوم أكرنفلك سوادي كلبوه..

وقلت لك: إبنحتفل عند الفجر

وبتشوفني أوضح كثير

بعد الظلام!!

كسرتني...

عيّرتني...

وقلت لي:

(يالعبد وجهك منطفي)؟!!