آخر وطن: وحشتيني...
نشر
في 11-03-2011
آخر
تحديث 11-03-2011 | 00:00
وحشتيني...كثر ما يموت... صبحي من بعد عينك وتذبل شمسي في عيني كثر هذا الظلام اللي سكن في قلبي وايديني كثر ما شفتك بدنياي فرح أيامي وسنيني كثر ما اظماك ولا غيرك أبد فيه غيمه ترويني ولا أنثى أبد غيرك تعلمني الرسم بالريح ومن جمرة شفايفها تلاويني! وحشتيني كثر ما تمتلي أقمار سماي لما... أقول اسمك ويغرق بالذهب طيني! كثر ما قلبي يتشجّر في حضرة هواك أنغام ويهتن لحنها فيني وحشتيني كثر ما صورتك ترسم درايش في جدار الليل وتتسرّب نهارات بشراييني وحشتيني شلون أقولها وتدرين إنك جد وحشتيني وحشني كل شي منك وكل ما فيك دفا قلبك حرير إيديك دهن عُودك وحشني عطرك الشانيل واللي لا سرى عرّى جنون الليل وصحّى نور ياسميني وحشني هالحنان اللي... يحضن رعشة غصوني لا هبّت شمالية ويدفّيني وحشني هالدلال اللي يحرق بارد أعصابي ومع هذا... أحبه موت ويغريني وحشني... لثغة بيانو يسميها الدلع: صوتك وهي فتنة دفا واحساس تموّتني وتحييني وحشتيني شلون أقولها وتدرين أنك جد وحشتيني وحشتيني وحشتيني
