حان وقت اللعب

Ad

وصفينا الكراسي

يالله دوروا عاد

والشاطر يفوز

عادي لو هو فاز

شايب

وعادي لو فازت عيوز

***

كل شي في اللعب جايز

دوس في بطن المنافس

لو يصارخ

لو يرافس

قول عنه ما تبي

قول جاهل

قول بايق مرتشي

انبطاحي

ما يواجه

بالامر يمشي مشي

دام بالآخر تفوز

كل شي عندك يجوز

***

اشغل الناس ابعضهم

وخلك انت في السليم

حتى لو فيك البلاوي

رقّص الحيه يا حاوي

وامسك خيوط اللعب

شيل واشدخ بالجميع

اضرب شمال ويمين

واظهر بصورة أمين

تطلع من المعمعه

دون خدش ودون جرح

وسط صفقه

ووسط ردح

واعتقد كلك نظر

المهم انك تفوز

وتحظى بالكرسي الخضر
شريدة المعوشرجي