درايش: خطواتك ثقال

لا مَر زولك... يا بعَد كل الازوال

قلبي يشوفك قبل نظرات عيني

وأحسّ خطواتك تسَحَّب بالامهال

مو عن مرض... لكن غوى الخطوتينِ

تمرني... وتْبَدِّل الحال في حال

وانته ولا حسّيت وشصار فيني!

قلبي وعيني ولهفة الروح... بإشكال

حولك... كأنْها حرب بيني وبيني!

ثقلك شموخ... ومو جسم شايل أثقال

غصنك يـ دوب يشيل تفاحتينِ

بالثوب تسْحَب خطوتك والصبر طال

خوفي برجا وصلك تعدّي سنيني

الصبح... في قلبي ثلاثين موّال

وفي الليل أنزف ما بقى من حنيني