درايش: ترفرف بصدري حمامه

تختنق فكره بصدري

إذا ما أقدر أبوح.

تنقلب كل الغناوي

في «الضميرالغايب» التعبان... نوح.

حشرجات الروح لمّا الروح

تطلع ... يا حمامه:

_الغصن مَبْرِي خناجر

_ ليلنا السهران... فاجر

_ دوحتج ذيج اللي كانت

... والغصون الخضر فيها

شلون ضاقت يا حمامه

ما هي دوح؟!

يموت همّي... وألْمس بنفسي الجنازه.

وفجأه يِطْلع

همّي ذاك اللي دِفنْته يوم في صمت المقابر

ليل أسود

ورده سودا

تنبت بْقلبي... تفوووح!

ينْدمل جرحي اللي كان...

وفجأه يرجع

فجأه يكبر

فجأه يكثر

يدخل الباب الجنوبي:

و حُوله إعياله... الجرووووح!

رُوح لحدود المسافه

جان لك قِدْره تروح

بس تذكَّر...

تخْتنق فيك الحمامه

إذا ما تقْدر تبوح!