كلمة راس: تحذر لا يغـشـونك

أنا أدري ما هو كل سهمٍ رميته يب يجي بالصيد

وأنا أدري ما هو بالساهل تحقق منوة عيونك

وأنا أدري ما هو كل يومٍ تعيشه مثل يوم العيد

وأنا أدري ما هو كل ناسٍ تحبهم يب يحبونك

وأنا أدري ما هو كل فارس مثل عنتر، مثل بوزيد

ولا كل شاعرٍ شوقي، تحذر لا يغشونك

ولا منهو عطي مرة كريمٍ، يعني بالتأكيد

ولا منهو منع مره عطيّه باخلٍ دونك

ولا من وافقك دايم في رأيك بالضروره يفيد

ولا من خالفك أصبح مع اللي يب يضدونك

تحذر من بعض ربعك، عدوك ما هو دوم بعيد

وجربهم على الشده وشوف اللي يفيدونك

يا عبدالله ترى الدنيا متاعٍ باليٍ بيبيد

ولا تركن على عمرك ترى في غفله يخونك

ولا تحسب غنى الدنيا يخلي الآدمي اسعيد

مـظـاهـر تـبـهـر الـنـاظـر تـنـبـه لا يـغـرونك

وإذا ضدك زمانك عن وصول اللي تبي وتريد

تـوجـه لـلي إن عِـزتـه أبـد مـا خـيّب ظـنونك

توجه للإله اللي إليا منه عطاك يزيد

عسى الله دايمٍ يا وليدي في حفظك وفي عونك

معاني قلت أسطرها، بيوت أبني بها وأشيد

تحصّن في مقاصدها عسى في يوم يحمونك