درايش: البيت

ملّيت... من بعض القضايا... وصدّيت

من عقب ما بيت الأمل صَك بابه

حسّيت... في عجْز الكتابه عن البيت

البيت مِظْلِم... صار كلّه كآبه

صدّيت... مو من خوف شلّة خراتيت

ولا طُمَعْت بشيخ يملك مهابه

صدّيت... لَنّي كنت أرجي "عسى" "ليت"

والعمر عَدّى... ما وفَت لي سحابه

صدّيت... لَنّي كنت... واليوم حسّيت:

الحق والباطل علينا تشابه

صدّيت... لَن الحق أصبح فتافيت

وميزاننا غصن إنكسر وسط غابه

ناديت... يرجع صوت نصّه تناهيت

والنص الآخر فيه تعوي ذيابه

وردّيت... يم بيتي على الباب خطّيت:

الصمت عن بعض الكتابه... كتابه!