درايش : «أربع صور»

صوره أولى:

لـ بيت متصدّع جداره

بابه امصدّي حديده

وضو خافت،

بير ناشف/ بير في ظل الجدار.

مدري في آخر مغيبه وإلاّ في أول نهار!

ثاني صوره:

جرّه مكسوره ووراها

ظل واقف/ شخص ما عنده ملامح

في يمينه حاضن أنواط ودراهم

في يساره- مو مبيّن-

صرّه شايلها حمار!

ثالثه عن:

ناس زحمه

غتر بيضا

كاميرا مصوره قفاهم

في مقابر؟!

مو أكيد انها مقابر

كان في الصوره غبار!

رابعتهم:

ورده ذبلانه وحزينه

معلّقه في سقف عالي

من خشب جندل قديم بـ لون بُنّي

وتارسه الغرفه صُفار!

ست حروف:

وألف ياء ونون راء

مثل قمّه من جليد

وباديه في الإنهيار!!