درايش : في الصباح وفي المسا

المسا... چنّي بكفي ألمسه

واحضن نجومه إذا أقبل سناك

والصباح اللي بضحكاتك رسى

إعلم إنّه يغار لا ضمّك مساك

والظنون اللي بصدري موسوسه

تحسن النيّات لا مرْها شذاك

هو زعلْ بالجد... وقليبك جسى

وإلا يعني تختبر فيني غلاك؟!

إن بغيت الصج... محبوبك نسى

الزعل وأصل الزعل... هذا وذاك

ما يصدّق لا ذكروا «كيد النسا»

الرجال تكيد أكثر يا ملاك

والقصيد اللي من النور احتسى

وسيّر بموكب يماري في بهاك...

مثل من يجلب تموره لـ «الحسا»

وسوقها مليان بعثوقه هناك!

يا قصيدة نوّرت وجه المسا

حرفها من نور... مطلعها شفاك

منهو لمّ الورد كلّه واغرسه

من أعالي غرّتك... لى منتهاك؟!