درايش: ورق طاير

اشـ قرّبك – حَد النفَس –

في ليلتي

ياللي بعيد بـ خطوتك

وشـ جابك ببالي؟!

عقب السنين اللي مضَت

واللي اشْلَعَت سدرة هوى

واللي بَنَت جدران وسْط الذاكره

(ظنّيت عميا الذاكره)

لكن على جدار انبنى

فجأه تطل

لمّا على غفله انفتَح

قلب الدريشه العاليه:

وشفْتك انا قبالي!

الوقت ربّانا بـ ألَم

والوقت أبونا اللي سِكَت

وفي سْكاته علّمنا حِكَم:

إن العمر

مثل الرسايل من ورَق

لمّا تطير وتختفي ويّا الهوا

وإن الزمن

من دون ما نشعر أبد

هو الهوا العالي!