درايش : وسميّه

يـ وسميّه الحبيبه الساكنه في الروح

يا رنّة مضاعد من ذهب صافي

ويا رقصة مزاج تألِّف الخطوات

يـ عصفورة ألم خافي

إذا رد الأمل... مذبوح.

مو كل الفرح... صِجّي

ولا كل الضحك... أفراح

إذا قلب الشجي مغبّي عن الدنيا وتر سادس

وإذا كان الوتر هذا

وتر يا حلوتي مجروح!

يـ وسميه بصمتك بوح.

عيونچ... روح.

ولو أكتب غزل، أكتب أمل، أكتب على بابچ

أنا حبري شجن وجروح.

وإذا قرّبت من معنى

إذا ممنوع عن معنى

الحچي مثل الجسد ما له ولا معنى

إذا ما كان يملك روح.

أبي أكتب غزل فـ عيون وسميّه

(تحط طيور وتغرّد على غصونچ يـ وسميّه)

ووسميّه مثل ديره صغيره وساكنه في الروح

حلَمت البارحه فيها:

بثوب أبيض وخد أبيض مثل قرطاس

حبر أزرق... تراجيها.

يهب ذاك الهوا... وضيّع خطاويها

أبد ما شوف

إلا كفّها المفتوح

ضباب... وكفّها مفتوح.

أناديها وتروح بعيد

أناديها ولا تسمع

أناديها... أناديها

وخذلني صوتي المبحوح!