درايش : راجع نهارك

راجع نهارك لا انكسر فيه ظلّك

ولا تعذّر في غيومٍ امْطلّه   

الليل من طول المساري يملّك

والصبح له سيفٍ بظهرك يسلّه

بعض الخطا منّك مغطّيك كلّك

وبعض الخطايا: خلْ ما صان خلّه

وحتى الذي حبيّت يمكن يعلّك

يهديك في قلبك ثلاثين علّه

واللي طمع في طيبتك مستغلّك

لا تنظر لزوله... تمعّن بظلّه

واللي تفيّا حدر بيتك وظلّك

يمكن إليا طال الزمن... يستحلّه!

واللي على درب الردايا يتلّك  

ما دمت مو قادر تنجّيه... خلّه

ومن لا ضحك سنّه على مزحةٍ لك

اعلم ترى له نفس يمكن مغلّه

اقرا الوجيه الواضحه في سجلّك

والود ما يحتاج شرحْ وأدلّه    

 

اللي يبي وصلك وقربك يدلّك

قلبه على ذيك المنازل يدلّه

 

إمّا يجي مثلك اذا جيت كلّك

والا ترى ينعاف هالود كلّه