درايش: برْفَع قضية

برْفَع  قضيّه عند مكتب محامي

"مكتب فهد/ بسّام"... وإلاّ حواليه

مو ضد جناب المختلس والحرامي

اللي  سِمَح له الشعب يمسح خطاويه!

إلّلي إذا علّيت مرّه بكلامي:

"ماكو أدلّه"!... وابْتلِش في بلاويه

ومو ضد حكومه غيّرت في الأسامي

و ماكو أحدْ على عملها نجازيه!

ومو ضد "مجلس" كل شكله هُلامي

لا طعمْ لا ريحه...ولا لي شغل فيه      

أصلاً ولا له في عيوني اهتمامِ

ومن لا تعَرفه... كيف تقدر تعاديه؟!

برفع قضيه ضد شعبٍ يحامي

عن الفساد وغاص لآخر معانيه

شعبي ونا أدري فيه مرّه حزامي

ووقت الشدايد ما خطر يوم طاريه

وقت الغنايم...  دايمين  الزحامِ

ووقت القحط... كلٍ يدوّر مفاليه

وأكبر دليل اللي سكن في الظلامِ

محدن سأل يا ليل وشلون طاويه؟!

شعبي وناسي حايمينن ظوامي

ونا استحي أشرب إذا انحاس صافيه!  

برفع قضيه... يا هلي يا عمامي

وكلن يورّد لي شهوده ومحاميه