درايش : الوقت أبونا...

اشـ قربّك

- حَد النفَس- في ليلتي...

ياللي بعيد بخطوتك

وشـ جابك ببالي؟!!

عقب السنين اللي مضَت

إللّي اشْلَعَت سدرة هوى

واللي بنَت جدران وسْط الذاكره

(ظنّيت عميا الذاكره!)

لكن على جْدار انبنى

فجأه تطل من فوق مثل الأغنيه

لما انْفِتَح... قلب الدريشه العاليه:

وشفتك أنا قبالي!

الوقت ربّانا بألم

والوقت أبونا اللي سِكَت

وفي سْكاته علَّمنا حِكَم:

إن الفرح

مثل الرسايل من ورق

المعنى يمكن ما يتم

لما تطير وتختفي

ويّا الهوا... وما توصل الغالي

وإن العمر خدّام في قصر الزمن

واللي رسَم خط التجاعيد... ابتسَم، فوق المرايا

الناعمه:

فنّان ساكن في القصر

اسمه "الهوا العالي".