درايش : الطائفية اليوم... فزعة قبيلة

كلٍ يرد لأصل الجذور القديمه

لو قال مهما ما قال ... معروف تاليه!!

لو يدّعي بعض المبادي العظيمه

لا بانت اشموسه ... تبخّر مباديه

"علمان"... لكن! لا غشى الجو غيمه

"شيعه وسنّه"... الكل تطفح معانيه!

لو كان مو دَيِّن، حياته جريمه

سكّير... والبارات ملّت خطاويه

لو كان ملحد والكتب له مديمه

ومثل المخدّه " ماركس" دايم ... امخاويه!

في حزّة الحزّه تحسّ بهزيمه

الكل يركض يم ربعه وأهاليه

خلّوك في صحرا الحياة اليتيمه

ما لك عصا... غير الذي معتصم فيه

جرّبتهم... كل التجارب هضيمه

كلٍّ نبَض عرْجه ... الطوائف تمشيّه

هم عندهم ... ما للوطن أي قيمه

وانت الوطن حُبّك... تهدْمه... وتبنيه