درايش : متى يفتح حزامه؟!

م بين الناس والزحمه ونسايم مو طبيعيّه

بروحي قاعد بروحي... أنفّخ في زقاراتي

بعد وقت العصر لكن ... كأنه شمسنا امعيّه

وكل ما تنزل اشويه... ترد وتعيد لحظاتي

من الجرسون في القهوه طلبت أنفاس "تركيّه"

مع التخفيف في السكّر... مثل ما هي عاداتي

م بين أجناس مختلطه ملامحهم أوروبيّه

أراضي قطعه من جنّه ونا في القلب جنّاتي

وقصيده غير مكتمله... غزَل في عيون وسميه

نويت اليوم أكمّلها وأعدّل بعض أبياتي

وفجأه...

الملتحي يدخل... (إهي مو لحْيه... إلْحيّه !)

صغير ومنتفخ أسمر عيونه شتّتت ذاتي

مثل مقروص يتْلَفّت وإيده نازله شويه

على خصره، يحك خصره، ونظراته بنظراتي!

وتحت الطاوله نزَّل كثير أشياء مطويّه

سواد الكيس من تحته لعَب في حسْبة أوقاتي!

وطارت لحظة اللحظه ولو كانت سماويه

طلَعْت وصاحب القهوه عرَف أسباب مأساتي

الحقيقه: أمحق القعده ولو كانت رومانسيه

إذا ما ارْتَحْت في القعده وقلبك خايف يحاتي !