درايش : الزمن يطوي ملابسنا

"كبَت" قلبه خشب... شاهد

على دور الفصول البيض

في ثنْية ملابسنا

ينام "الشتوي" في درْج الخشب عالي

ولا يدري...

يجي له يوم؟

أو غصن العمر يذوي إذا طاع الهوا في يوم يابسنا؟!

تقول الروح يا ليت القدر ينسى

ويدور الحول

ومع "الشتوي" - يا ليته لو - بذاك الرف... حابسنا!

ملابسنا...

اهو صچ الزمان يدور ونصافح ملابسنا؟!

أو عود الشجر يكبر؟!

ومايك يا نهر جاري

ولكنّه بملامح غير

ويرفض إنّه يتْكرر

ولا يوقف ولا يصبر ولا همّه محابسنا!

نقول إن الفصول تدور!

وإهي ما قط أبد دارت

ولكن الطيور اللي تمر بالليل تتشابه

تدش بستاننا غفله

وتلقط من حبوب الروح چم حَبّه،

وتقطف زهرة الرمان

ولا حنا انتبهنا لك

ولا ياخذ حذَر منَك عجَب - يا طير - حارسنا.