درايش : من ورا الباب!

تحالفات وتكتكات وجماعه

مثل التحزّب بس مو شكل الأحزاب

و من غير محْضر أو ورق أو طباعه

وإلّا هوامش فوق في صفحة كتاب

واللي يبي الصافي يلم اجتماعه

في ظرف ساعه ويتّفق جمْع الأحباب

سمعت واحد قال هذي "البضاعه"

وسمعت ثاني قال خل نحسب حساب

وسمعت ثالث قال سمعاً وطاعه

بأمر "السياسه" لا تدوّر عن أسباب

وسمعت رابع واضحٍ باندفاعه

قال اتفقنا اليوم... خلّونا أصحاب

وسمعت خامس قال: كلّي قناعه

بشروط عارضها بلا ستر وحجاب

وسمعت سادس كان كلّه وداعه

قال الحچي لا يطول في لوم وعتاب

وانفض هذا الجمع في نص ساعه

ومثل البدايه... وِد عالي وترحاب

ونا المواطن همّلوني الجماعه

ومدري شنو جاري وحاصل ورا الباب!

عندي تناتيف الحچي والإشاعه

والقلب من كثر الهواجيس مرتاب