درايش : دولة مؤسسات مو قبلية!

الدار مبْنِيّه على أحكام دستور

وش جاب طاري اليوم عصر القبايل!

ذاك الزمن له دور واليوم له دور

ولا نبدّل في زمنّا بدايل

لا سيفْ في هالوقت يحمي من الجور

لا خيلْ نركب في المعارك أصايل

لا شيخ فخذٍ حوله الناس طابور

ينزل على جمع المعادين صايل

لا غزوةٍ يم قومْ معْ شقّة النور

نكسب حلالٍ من عيال الحمايل

ولا كسرنا فلان وفلان مكسور

ناخذ نياقه وأحمر الدم سايل

لا بيت مبني من الشعَر دلتّه تفور

ملجا الضعيف وضد من جاك عايل

هذي القبايل والنعم مجد مذكور

وشيوخها متحدرين السلايل

لكن مثل ما الشمس في فلكك تدور

إعلم ترى كل وقت لابد زايل

دستورنا هو القبيله... لنا سور

والحال ما يحتاج شرح ودلايل