درايش : تحقيق مجلس الأمة بالاعتداء على صحفي!

"تحقيق" والتحقيق ماله أبَد راس

يمسح خطا المخطي ويحرّف بقرطاس

خلا التهايم راكبه صاحب الحق

ووقّف معَ ميلة عساكر وحرّاس

انت الخصم وانت الحكَم في القضيه

"مجلسنا"... لكن بدلتك عسكريه!

واليوم دارت نيتك غير نيّه

يا ماسك الميزان... طفّفت بقياس

هم حكّموك ووهّلوك الجماعه

"مجلس" يحقّق في الأمور بقناعه

وعقب العنا ردّت علينا البضاعه

وزودٍ عليها ديون من غير أي ساس

إن كان "مجلس شعب" هذي علومه؟!

لا تشتكون بيوم ظلم الحكومه

بار العدل في السوق منهو يسومه؟

ما ينشرى هاليوم لو بِيع بأفلاس

ياللي حسبت الحق في الناس مضمون

ما كل من حولك تراهم يوافون

قِط الورق لا شفت ربعك يغشون

وكل الورق مخبوص من "ديْمَن" و"حاس"!

ياللي متَرْت وماخذ الطاق مطبوق

حنّا نطرنا... ما صفينا على حقوق

إحذر إذا شخص انظلم بات مخنوق

من "مجلسٍ" للناس... ما أنصف الناس!