درايش: بشّروا المزوّرين... برداً وسلاما

(1)

فكرة التزوير صارت للقيَم في مجتمعنا

والضماير

ماهي بس قصة "حيازة" أو شهاده مزوَّره!

مجتمع مقلوب حاله، شلون كان شلون صار،

الرشوه و"المقسوم" والتزوير عادي!

وكلها صارت "شطاره"

دقّقوا بختم اللي زوَّر مجتمعنا

وحاسبوا من زوَّره!

وقصة التزوير هذي.... مزوَّره!

إنطروا اسبوعين شوفوا أو ثلاثه

ينتهي غبار المعارك دون زبده

لا كشفنا ولا عرفنا

وما مسكنا أي مزوِّر

چِنّهم دخّان طاير

أو عصابه (ربنا راضي عليها) وسْط قلعه مسوَّره!

(2)

كوره ما تدخل المرمى،

رغم لعبات الهجوم وكسر في ضلع الدفاع

وبين صيحات الجماهير العريضه

تضرب "القائم"... وترجع!

والعذر في كل مرّه: هذي كوره مدوَّره.

(3)

عندي شك: بعض الكراسي والمناصب والنوايا وكلمة الناطق الرسمي و"حرب" في وجه الفساد ومن رشا واللي رشاه وضرب إيده والحديده وفضح "إيداع" الضماير والجزر ذيج البعيده ومجلس الأمّه ولجانه والقوانين الجديده ونيّة الحاجه "رشيده"..... إلى آآآآخر اسطوانه

كل هذي مزوَّره.